政壇：搞搞政：嫻姐話長津壓力來自長者

政府建議嘅長者生活津貼計劃撥款，雖然最後戲劇性咁獲得通過，但工聯會呢一役飽受抨擊。佢哋嘅立法會議員陳婉嫻尋日同傳媒茶敘時，承認區內的確有唔少年長會友對佢今次嘅表現作出猛烈批評，坦言真正嘅壓力係嚟自長者，佢又認為自己係「死硬派」，覺得要做嘅事就會千方百計咁向政府爭取，其中爭取立法標準工時嘅方案亦唔例外。

所以，嫻姐話工聯會喺今個立法年度，會爭取政府完成所有諮詢，等下屆立法會可完成立法。不過佢認為特首CY梁振英今次喺長者生活津貼計劃上，採取嘅強硬態度對行政立法關係有一定影響，因為任何政策都要有醞釀期，希望政府唔好怕立法會，有乜新政策盡早攞上去喎。

至於CY嘅表現，嫻姐話喺僭建事件上唔收貨，因為每隔幾日就被人爆大宅另一處有僭建，籲CY一次過將大宅啲「大窿細窿」講晒出嚟。但嫻姐話CY喺三場施政報告及財政預算案嘅諮詢會上，被狙擊都繼續出席，抵讚！