政壇：高佬賢推「雞泡膠」益姊妹

一班立法會議員尋日去咗工展會掃貨，包括Ann蔣麗芸、葛珮帆等議員狂掃罐裝鮑魚、西班牙火腿、冬菇及麥皮等食物，最誇張係連湯煲都大手買入十幾個，仲落柯打直接送貨到立法會添，但最特別嘅都係漁農界「高佬賢」何俊賢。

話說高佬賢行過海味攤檔時，極力推介本港漁民生產嘅花膠，仲話城中姊妹們若受經痛困擾，可以食「雞泡膠」醫治。吓？點解佢識呢啲嘢o架？佢話自己係漁農界代表，當然識啦！據講「雞泡膠」係河豚鰾，係婦女調經妙品，對氣管虛弱、鼻敏感、肺弱同白內障好有療效。