SUN微博：少膽虫手記：真係有創意
少膽虫講過好多次，作為傳媒，創意真係好重要。少膽虫一路以為《爛果》喺報界已經係創意第一，勢估唔到，依家連呢瓣嘢都已經畀正義傳媒迎頭趕上，真係大鑊！
雖然話《太陽》、《好報》係好睇，但係少膽虫話晒都係壹全霉嘅人，要明目張膽咁拎返公司真係驚驚哋。何況少膽虫出名少膽，行過公司大閘，真係腳都震埋。
返到上去，少膽虫已經急不及待打開《太陽》，細細翻閱。精彩嘅標題、有心思嘅排版……正當少膽虫沉醉於無與倫比嘅閱讀樂趣之際，神句突然映入雙眼，正是：
天呀！少膽虫就算幾少膽，都忍唔住喺公司大叫：「好句！好句！寫得好！寫得妙！」雖然明知淫黎就喺不遠處，話唔定仲已經用佢對淫眼睥到行，但係呢一刻，少膽虫嘅文人風骨突然一下子爆晒出嚟，話之佢死，見到神句一定要讚好！
即係咁，雖然少膽虫不學無術，但係對於廣告技巧，都算略知一二。「好來好去有好報」，喺呢句入面，已經用咗三個好字，啲唔識嘢嘅，可能會覺得重複，但係少膽虫就好肯定，諗嗰個一定係嘔心瀝血，用最少嘅字數去令睇嘅人記住《好報》，佩服佩服！七個字之中，有三個「好」字，除咗加強語氣之外，更加係點題嘅最好方法。
咁都未算，下句「偷偷摸摸現眼報」仲絕。話說廣告技巧中，有所謂「靠嚇」嘅手法，即係用恐怖嘅嘢，去令受眾抗拒某啲嘢，好似「吸煙可致陽痿」就係一例，我哋成日偷偷摸摸咁宣淫販賤，都唔知幾時會現眼報喎！呢副神聯對少膽虫嚟講，就好似當頭棒喝。少膽虫發誓，就算淫黎唔鍾意，少膽虫都要光明正大咁睇《太陽》同《好報》，實行要做到大埔一個太陽，堆填區一個太陽！
