SUN奇古怪:Sun潮語:跟隊

睇賭片玩話事啤,最有型一幕通常係最後互相鬥大嗰一刻。對手話大你一千萬,然後賭神又好賭俠也好總之係主角就會好勁咁講一句:「我跟!」呢句「跟」嗰種信心同力量真係chok都chok唔到,要係由內而外都信心澎湃至講得出,潛台詞係:無論你點樣大我,無論你同我點玩,我都奉陪到底……英偉到爆!

不過除咗玩話事啤,「跟」係有型之外,一般嚟講個「跟」字都係貶義,即係跟隨跟風跟大佬跟大隊,總之係無乜主見,人做我又做慌死蝕底。好似拍戲咁,邊類片收得就人人去跟風拍嗰類片。又好似廣告咁,見人哋出隻貓,我又要出隻狗。總之跟貼大市,跟大隊就掂。

不過潮語「跟隊」就有啲唔同,「跟隊」嘅意思表面係跟次序排隊,但實質用法上就可以好廣泛。通常係遇到正嘢,但又供應有限,咁就肯定要排隊輪住嚟試,又或者生活上好多嘢都係要「跟隊」。例如,公司嚟咗個好索嘅單身女同事,男同事們都好想約佢單獨食晏,呢啲情形,就肯定要「跟隊」!

「跟隊」呢個潮語出處其實係嚟自球場。因為以前體育設施嚴重不足,四條公共屋邨得一個足球場,幾十人爭一個波地。於是就發展出一套潛規則就係「跟隊」,即係喺球場如果有兩隊踢緊波,而你嗰隊又想踢的話,你就可向球場大嗌一聲「跟隊」!之後,踢緊嗰兩隊就會自動自覺地一球定勝負,輸咗嗰隊就要走,讓畀你嗰隊落場同贏嗰隊鬥,呢個就係「跟隊」嘅典故。

第一手消息請下載on.cc東方互動iPhone/iPad/Android/Windows Phone Apps

廣告人、網台主持 阿東