政壇：政商定格：「大摩合唱團」行善傳歡樂

臨近聖誕節，四周圍都充滿節日氣氛，尋日喺圓方除咗啲好靚嘅大型擺設之外，仲有「摩根士丹利董事合唱團」一年一度嘅表演。

今年已經係連續第十二年，大摩一班ibanker放低平日緊張嘅面孔，圍起紅色頸巾，同一班小朋友，當中包括嚟自生命小戰士會同香港保護兒童協會嘅小朋友一齊表演，有啲仲係班ibanker嘅仔女添！合唱團大約唱咗五六首歌，仲首次有鼓手參與添，嗰度樓底高，唔係太聽得清楚佢哋唱乜，但氣氛就真係夠晒歡樂！

大摩除咗唱歌之外，原來仲做埋善事，過去一星期喺公司內部籌得超過二百五十萬，將會捐畀「Operation Santa Claus」同生命小戰士會。