政壇：政商定格：哥頓太享受滑雪二十年

日前喺一個酒會上見到合和主席「哥頓」胡應湘嘅太太郭秀萍，佢戴咗條好特別嘅頸鏈，係以類似紅寶石嘅珠仔串連而成，非常搶眼。記得冇幾耐前，佢出席活動時都有戴過呢條頸鏈，睇得出佢對條鏈幾咁情有獨鍾。

哥頓太話條鏈係由天然珊瑚石製成，佢多年前遊台灣時買落嘅。不過，依家台灣嘅水質受到污染，靚珊瑚已愈嚟愈少，再去都未必買得到喇。年尾屬旅遊旺季，佢話嚟緊會同老公孖住去日本北海道滑雪，原來佢已經滑咗二十年，感染到囝囝胡文新都愛上呢項運動。佢又話自己好享受旅行，事關可以暫時避開鎂光燈嘅追蹤，過番啲自由自在嘅生活喎！

同場仲有民政事務局前局長何志平，問佢退休後有乜搞作？佢話繼續專注中華能源基金委員會工作，每年舉辦大型論壇，下月中將會舉行一個「中美日對話」，邀請退休將軍、大臣同學者對談，旨在提升國家嘅軟實力。