政壇：搞搞政：干預司法泛民雙重標準

立法會司法及法律事務委員會尋日討論應否召開特別會議，討論律政司建議終審法院就外傭案件提請全國人大常委會釋法事件，白鴿黨「鐵頭仁」何俊仁要求加開，強調今次釋法事關重大，但動議被建制派群起反對而否決。建仔主席譚耀宗話依家唔適宜喺議會討論事件，就算討論都要等終院有判決至得；本身係大律師嘅議員廖長江亦認為案件已進入司法程序，一旦討論案件好可能會影響判決。

照計公文袋有幾個大狀，冇理由唔知o架？就喺呢個時候，公文袋嘅郭榮鏗就撲出嚟話，如果法院審緊單案就唔准討論，咁立法會咩都唔使傾啦！鐵頭仁亦加把口話，立法會只討論釋法原則，唔一定要提到釋法案件。

佢哋兩個講到咁大義凜然，但完全唔記得個幾月前，基本法委員會副主任梁愛詩只係喺一個學術講座上，話本港司法界同法官對中港關係缺乏認識，所以有時會判錯案，就係呢一句，就畀泛民鬧到狗血淋頭，鐵頭仁同郭榮鏗發炮批評詩姐粗暴干預司法獨立，又要求佢收回言論。

既然泛民當時覺得詩姐發表言論會影響司法獨立，點解佢哋依家又「寬己嚴人」呢？擺明就係雙重標準喇！