政壇：人大候選人騷往績造勢

下個禮拜三就係港區全國人大代表選舉投票，好多候選人都用「揼石仔」方式爭取各方支持，好似青年工業家協會尋日舉行嘅座談會，就有多名候選人同工業界猛拉關係為自己造勢。另一個指定動作係喺宣傳品印載同國家領導人嘅合照，尤以中華總商會前會長霍震寰最犀利，七名新任政治局常委中，佢先後同其中六人合照，完全係實力嘅展示。

喺座談會首先出招嘅係剛卸任青年工業家協會會長嘅顏寶鈴，佢自言青年工業家協會係佢嘅家；會計師公會前會長區嘯翔就自爆曾做過評判選出青年傑出工業家；保安局前局長李少光仲威，話以前曾協助內地港廠商解決糾紛，藉此拉關係。

早前鬧得熱烘烘嘅國民教育係座談會嘅另一焦點，早前曾因《中國模式》教學手冊捲入國教風波嘅教聯會會長楊耀忠，承認早前學校對推行國教嚇驚咗，但依家氣氛已好咗喎。競逐連任嘅全國人大常委范徐麗泰就建議政府把中國歷史列作必修科，唔知教育局會否認真考慮吓呢？