政壇：銅像揭幕饒宗頤豎拇指

北京雕塑家紀峯近日為「偶像」國學大師饒宗頤鑄造一個高一點八米嘅全身銅像，雕像尋日喺位於荔枝角青山道嘅饒宗頤文化館「天光雲影」庭園正式揭幕，九十多歲嘅饒大師精神奕奕出席儀式，仲豎起拇指大讚銅像栩栩如生。饒大師透露，事前佢對銅像鑄造只有一個要求，就係銅像嘅形象要「平易近人」，結果製成品令佢相當滿意。

紀峯原來跟過饒大師學書法，師徒情深，決定自掏腰包為老師鑄造銅像，以七十多歲嘅饒大師面容為藍本，花三年時間完成作品。