政壇：龔耀輝化身會計界長毛

香港會計師公會尋日舉行周年大會，本來屬於「和諧」大會，但係估唔到理事之一嘅Ronald龔耀輝化身成會計界長毛，將立法會嘅抗爭文化帶入會計師公會。

Ronald早兩個幾星期已預告想提出減收會費動議，但會長包凱尋日連討論都唔准，佢做定兩手準備，一早拎咗近三百張授權票突襲，而其他理事冇預計佢有此一着，所以「委託核數師」同「確認財務報告」兩大重要議案都被佢一手否決咗，寧願大家一鑊熟。今次公會被突襲後，聽聞班理事都好頭痛，已經問緊法律顧問點解決。不過，有律師話確認財務報告同委託核數師都係小事，只要開多次特別會員大會通過就得，對公會冇乜大影響喎！

至於換屆選舉就平安得多，副會長趙麗娟獲選為會長，陳錦榮同陳美寶就獲選為副會長。趙麗娟係利豐發展董事，早前仲加入咗新民黨，唔知佢將來會唔會選立會呢？