政壇：元旦遊行商戶難撈

由廠商會舉辦嘅工展會每次都吸引數以十萬計嘅市民入場，聽聞有廠商會中人今年特別憂慮，事關今年工展會跨年喺維園舉行，而民陣又喺元旦日發起大遊行，大家齊齊逼爆維園。廠商會最近憂慮去買蝦子麵、電飯煲嘅市民被當成遊行人士，谷大咗遊行人士數目，變相成為「倒梁」一族，所以向警方反對民陣喺同一地方搞遊行。　

市民怕逼展商慘情

今次元旦遊行人數，相信係特首CY梁振英民望嘅寒暑表，而民陣召集人孔令瑜日前估計最少有兩萬人上街。廠商會副會長Jimmy吳永嘉話，今年工展會租用晒維園六個足球場，的確係唔夠地方再畀遊行人士使用，但佢初步諗過唔怕工展會嘅人流被當成遊行人士，事關工展會喺足球場搞，而遊行人士好大機會喺中央大草坪集合，加上工展會要憑票入場，警方應該分辨到兩批人。不過，佢就好擔心人流疏導方面會造成混亂，令商戶做少好多生意。

Jimmy話每年工展會為應付龐大人流，銅鑼灣同天后各設出入口，假設銅鑼灣出入口因為遊行要封路，咁去工展會嘅市民就塞死晒成個天后。加上元旦日係公眾假期，下午又係入場黃金時間，萬一有市民因為唔想逼而唔去工展會，咁班商戶一定會呻做唔到生意。

據聞因為廠商會反對，所以警方至今未有向民陣發出不反對通知書。但假如政府最終唔准民陣喺維園出發，睇怕只會進一步激起民怨，分分鐘會拉高遊行人數。