SUN微博:少膽虫手記:淫賤黎咩頭有事?

近日淫賤黎愁眉深鎖,一副心事重重嘅樣。少膽虫身為老腫,絕對唔關心佢發生咗咩事,反而驚佢心情差會搵啲下屬出氣,分分鐘少膽虫都會成為無辜嘅羔羊。可惜淫賤黎一咆哮︰「少膽虫,同我入房!」就注定不幸嘅事永遠都會跟住少膽虫。入到房嘅少膽虫,雖然上半身扮晒淡定,但下身卻很誠實,雙腳打晒震咁問︰「老細,咩事呢?」但估唔到淫賤黎竟然文天祥上身,眼有淚光,仰天長嘆︰「唉……男人最痛!」聽到呢個哀號,少膽虫心諗淫賤黎雖然係廢渣,但本住大家都係男人,都出吓聲安慰吓佢︰「老細,呢個喺人生必經嘅階段,我識個醫生,佢醫呢啲好叻o架。」淫賤黎聽到,即刻破涕為笑,「少膽虫,當真?」少膽虫見上位機會又嚟,自然起勢咁擦鞋︰「我少膽虫拍心口保證,我唔少死黨都係靠佢!」「少膽虫,你過嚟摸吓我個頭,個頭咁樣都有得醫?」

少膽虫一生做過唔少錯事,但從未試過咁後悔,惟有哀求淫賤黎︰「老細,咁重口味,我摸唔落手……」咁啱編輯肥豪行經房門,少膽虫大叫︰「肥豪,入嚟一齊摸吓老細個『乖頭』喎!」肥豪一怔,想急急腳走,少膽虫即刻拖佢入嚟。「老細、虫哥,又關我事?」肥豪死死氣地講。少膽虫抱一齊死嘅決心,捉住肥豪隻手,向住淫賤黎嘅重要部位步步進逼,只見肥豪面如死灰,忽又突然高呼︰「唔好呀,好污糟o架!」「你兩個究竟搞咩?」淫賤黎狐疑一問,「我叫你兩個摸吓我個膝頭啫,都喺度推三推四!呢排《爛果》唔掂,又被人告,我都要準備走佬o架,我膝頭有事,你兩個就知味道!」少膽虫同肥豪即刻放下心頭大石,上前一摸,點知淫賤黎突然發出奇怪嘅呻吟聲︰「呀!呀!好爽呀!係呢到喇……」

少膽虫同肥豪一出淫賤黎房門,全層編輯都對我哋行注目禮。睇嚟今日嘅事,又會成為《爛果》編輯部嘅「佳話」……

第一手消息請下載on.cc東方互動iPhone/iPad/Android/Windows Phone Apps

少膽虫