政壇：政商定格：保險教父指迷津由細做起

有「保險教父」之稱嘅Andrew楊梵城原本諗住喺民豐控股大搞保險業，最終成泡影，其後買番民豐旗下三間經營保險經紀業務。尋日見到「教父」，問佢有冇諗住請番多啲員工一齊大展拳腳先？佢坦言除非有乜嘢大機遇，好似大圍經濟超乎預期咁好，又或者碰上合適嘅合夥人，否則唔諗住大搞喇，「就好似我啱啱入行咁，大嘅總要由細做起。」

保險業一向競爭激烈，見慣世面嘅佢對保險業前景仍然樂觀，佢話「只要人有生死，（保險）就永遠有得做」，競爭固之然有，但唔同公司嘅產品管理都唔同，最重要始終係有好嘅人才。