政壇：政商定格：吳文華授文書技巧似播種

退咗休五個幾月嘅立法會前秘書長Pauline吳文華日前現身一個活動，見佢精神爽利，成個人好似年輕咗咁，佢話啱啱去完多個地方旅行，叉夠電先返港，加上依家每日都可以瞓到足至起身，梗係生猛晒啦！佢話依家忙於到各大機構團體「傳授武功」，教導年輕人文書技巧及會議流程，笑稱好似個農夫咁到處播種喎。

Pauline過去多月已遊遍東南亞、加拿大、澳洲、新西蘭同台灣，吃喝玩樂之餘，仲以崇德社東南亞代表嘅身份，四出推動婦女權益，幾乎冇一刻停低過。

早已視立會為第二個家嘅佢之前預告過，將會重返立法會幫手，前晚佢就確認明年一月正式開始兼職，雖然工作性質仲未傾掂，但可以繼續做自己喜愛嘅工作，相信做乜都咁高興啦。