政壇:搞搞政:長毛與魔童末日救世

最近熱爆嘅話題「世界末日」仲有唔夠十日就來臨,香港一個網絡調查就選咗來自唔同界別嘅「末日救世者」,希望有英雄挺身而出打救地球。政壇界別奪冠嘅係「長毛」梁國雄,而城市電訊主席「魔童」王維基就「爆冷」當選娛樂圈冠軍。

長毛話之前喺立法會財委會「拉布」力爭取消長者生活津貼嘅資產審查行動,技不如人被政府「剪布」而失敗告終,所以佢都自愧話:「連老人家都救唔到,點去拯救地球呀!」不過,佢最想喺世界末日打救特首梁振英,等佢見唔到世界末日喎。

至於力壓天王天后嘅魔童,可能受到政府遲遲唔發免費電視牌照影響,對拯救地球冇晒心機,淨係話最近公事太忙,冇時間陪囝囝打機,所以佢希望趁世界末日陪囝囝。

雖然佢哋都有唔同原因拒做「末日救世者」,但就算佢哋肯做,分分鐘變成「救世神棍」。事關一個以為好正義玩拉布,但其實阻住幾十萬長者攞生活津貼,另一個未攞到免費電視牌就猛燒銀紙,連自己都打救唔到,點打救世人呢?

第一手消息請下載on.cc東方互動iPhone/iPad/Android/Windows Phone Apps

設計圖片