政壇：葉劉愛女怕星洲藤條

新民黨主席葉劉淑儀已故嘅爸爸係新加坡人，所以葉劉每年都會過新加坡拜爸爸，今年聖誕節都唔例外，但今次佢特登帶埋愛女Cynthia葉榮欣去，原來Cynthia咁多年都未去過新加坡喎！

Cynthia自細聽聞新加坡法例好嚴，如果當眾食香口膠或去廁所唔記得沖水，都會畀警察捉去打藤，而且仲要係打屁股嗰種。咁啱佢最鍾意食香口膠，所以就係呢個童年陰影，搞到佢咁多年來都冇去過新加坡拜外公。

葉劉話事隔咁多年，如今Cynthia都大個女，按道理都應該帶囡囡拜下外公。講開又講，佢話近年發覺新加坡嘅骨灰龕問題同香港同樣嚴重，但新加坡容許龕位向上發展，故此佢爸爸個龕位近年愈擺愈高，佢覺得高空發展呢招，香港都可以諗吓。