政壇:上海返港徐英偉去錯機場

本來民政事務局政治助理Caspar徐英偉喺上海復旦大學讀緊四年制公共政策博士,為咗完成個學位,一個禮拜要請一日假,通常係星期三夜晚飛去上海返學,第二日夜晚趕返香港做嘢,就係咁佢每個星期喺上海虹橋、浦東兩個機場輪流搭飛機,有時仲會因趕時間而去錯機場,搞到大失預算。

今個學期佢已因要返學而請爆假,下個學期要被迫停學半年。佢話學校批准佢喺香港一路睇書一路寫論文,之後將啲功課電郵返學校。

除咗忙於返學,佢喺香港嘅時候仲忙於撲奶粉。佢住喺九龍塘,平時佢哋通常去開地鐵站買奶粉,但唔知點解啲奶粉周不時會畀內地客搶晒,搞到佢成日都買唔到奶粉同尿片畀囝囝。

為咗令囝囝唔使餓親,佢同老婆特登分頭分區格價搵奶粉,佢哋最後終於喺灣仔發現囝囝平時食開嘅牌子,仲發現灣仔啲奶粉平過石硤尾十幾蚊添!

第一手消息請下載on.cc東方互動iPhone/iPad/Android/Windows Phone Apps

徐英偉喺復旦大學食餃子。(徐英偉提供)