政壇：EQ溜出立會買煲

尋日下晝四點鐘，正當立法會開會期間，就喺中環太子大廈某間賣高級廚具嘅店舖發現咗一個熟悉嘅身影，原來係建仔嘅立法會議員EQ葛珮帆喺度買緊煲。當EQ畀完錢後竟然兩手揈揈走出店舖，記者於是上前問佢點解畀完錢都冇收穫？佢就話稍後搵人幫佢提貨喎。點知五分鐘後，竟然見到佢折返舖頭攞番個煲，然後話要趕住返立會開會。原來佢之前離開店舖只係去廁所啫，莫非佢怕被人話佢蛇王唔開會，所以要避開記者？

搵勻港九 只剩一個

不過，EQ蛇王原來係有苦衷嘅，話說佢個妹一直都好想買個煲食芝士火鍋，可惜一煲難尋，搵勻港九都搵唔到一個啱心水嘅煲，所以可以想像，當EQ尋日三點幾鐘收到朋友短訊話幫佢搵到個煲時，EQ當然好雀躍。佢話原本諗住叫同事去買煲，可惜無論佢點形容，同事們都一頭霧水唔知佢講咩，幻想唔到呢個一度被懷疑絕迹香港嘅煲係乜嘢樣。

結果，EQ因為朋友一句「只剩一個，賣晒就無」嘅最後通牒，本着一顆愛妹深切嘅心，家姐惟有毅然步出立會議事廳差唔多二十分鐘，出咗去中環買埋「最後一煲」。最重要嘅係，佢花完一千多元買個煲，淨係知個煲係歐洲貨，連個煲係咩牌子，貴在啲乜都唔知，所以話呢，佢真係個好家姐，呢個婚姻與家庭治療碩士絕非浪得虛名o架！