CY不信任動議否決

立法會昨日以二十七票贊成、五票棄權、三十四票反對，否決對特首梁振英的不信任動議。泛民主派狠批梁振英為「道德毒瘤」，多次講大話隱瞞山頂大宅僭建，特首之位是「呃番嚟嘅」。建制派則呼籲社會給梁振英多一個機會，認為糾纏僭建問題只會妨礙新政府施政及香港發展。梁振英昨日再就事件表示歉意，承諾將來做事會更加謹慎，希望事件可告一段落。但梁振英之後仍須面對泛民三輪追擊，包括下周三立法會的特權法查僭建事件議案、泛民在元旦日舉行的倒梁遊行，以及泛民計劃於明年一月提出的彈劾動議。

梁振英昨早參觀青衣置安心項目後見記者，未有主動提及稍後進行的不信任動議。記者用英文詢問有關不信任動議的問題時，梁忽然「轉台」用中文回答，重申自己在處理過程中有疏忽，但聲稱已於日前的答問大會「全面交代咗嗰件事嘅全部事實，亦都向立法會同社會人士道歉」，希望經過今次事件，「我能夠做事更加謹慎」，事件可告一段落後，與立法會及全社會齊心做事。他回答了一條問題便轉身離開。

立法會傍晚開始辯論由民主黨胡志偉提出的不信任動議。胡志偉批評梁振英在答問大會不提誠信、不提慚愧，只為疏忽道歉，是政治無賴，他強調梁振英大宅僭建證據確鑿，卻在特首選舉以此攻擊對手唐英年，犯的不僅是誠信問題，而是欠缺政治道德，必須引咎下台。公民黨梁家傑形容梁振英「呃個特首嚟做」，留任只會令本港制度敗壞。工黨李卓人更炮轟梁振英是「連環大話精」，在答問大會聲稱「冇講過我冇僭建」是最大的謊言，「心術不正到一個得人驚嘅地步」。

下台對香港並非好事

外號「唐英年家臣」的廠商會林大輝指出，一般新界村屋有僭建，屋宇署會雷厲風行執法，質疑為何特首僭建，封了牆就等於無事，繼續袒護梁振英，只會是糖衣毒藥，令梁振英一錯再錯，變成童話故事入面「國王的新衣」，故決定投下贊成票。

多名建制派亦有發言批評梁振英僭建，但認為「罪不至死」，應給他一個機會繼續服務香港。身兼行政會議成員的新民黨主席葉劉淑儀指出，難以找出傑出人才擔任特首一職，強調梁振英下台不僅是對他個人，對整個政府班子及整個香港都並非好事。另一「唐營」議員自由黨田北俊表示，自己也想投下贊成票，但想不到梁振英下台後可找誰接替，若由政務司司長林鄭月娥接任，擔心其身體會負荷不了，梁振英特首之位是「呃」回來，但亦「做工幾勤力」，應給他一個機會，兩年後再決定是否倒梁。

動議最後只得泛民、林大輝及獨立建制派謝偉俊贊成，自由黨五票棄權，其他建制派反對，缺席投票的則有公民黨湯家驊、民協馮檢基及醫學界梁家騮。

不信任動議正反議員發言

贊成：

民主黨胡志偉：佢（梁振英）犯嘅唔止係誠信問題，而係欠缺政治道德。最嘆為觀止嘅係佢話處理咗就等於冇咗，佢嘅說話係侮辱香港人嘅智慧。

公民黨梁家傑：如果梁振英呃個特首嚟做可以袋袋平安，揭發咗都可以過骨，點同下一代講？佢呢個道德毒瘤，留住只會讓佢繼續說謊，制度敗壞。

工黨李卓人：我冇講過我冇僭建，呢句係最大謊言，佢心術不正到一個得人驚地步，語言偽術登峰造極，個個建制派今日做晒「保梁局」，成班建制派沒有最無恥，只有更無恥。

社民連梁國雄：地位愈高，遺害愈大，我掟一掟嘢就話教壞細路，但你哋點解容許特首繼續講大話？

廠商會林大輝：唔想特首變成童話故事入面嘅國王的新衣。我熱愛香港，忠言逆耳，我都係投贊成。

反對或棄權：

民建聯葉國謙：今次不信任動議，只係泛民追擊特首梁振英嘅第一擊，目的係逼佢落台。僭建事件係有值得批評嘅地方，但如果純粹因應僭建而要下台，就不恰當。

新民黨葉劉淑儀：要摧毀手上嘅嘢，叫人落台容易，要重建係艱難，要搵傑出人才擔任特首係唔容易……目前應要畀特首一個機會。

金融界吳亮星：議會太意氣用事，容易壞事，要三思。我哋評價梁生表現，應該聚焦喺能否做到佢嘅承諾，糾纏喺僭建不過妨礙施政，有欠公允，現在係告一段落嘅時候。

自由黨田北俊：佢份工係呃咗番嚟，但佢做嘢幾勤力呀，做唔做到畀個機會佢呀。我哋唔係挺佢，挺嘅係香港，最後決定放佢一馬，畀佢兩年做實事，做唔到先郁佢。