SUN微博：少膽虫手記：淫賤黎唔知醜

少膽虫入咗行咁多年，真係咩奇聞都見過聽過。不過，尋日內地發生咗單新聞，真係令少膽虫大吃一驚，話說上海竟然出現三個太陽嘅奇景，成個《爛果》編輯部都係咁講呢件事，講講吓少膽虫又回想起上次同淫賤黎傾《好報》時嘅情景，仲情不自禁咁講咗句︰「天上一個太陽，手上一份太陽，香江閱報風氣如此，夫復可求？」

編輯肥豪聽畢，似若有所思，口中不停呢喃。少膽虫見佢一臉憂心，自然問吓所謂何事，「其實小弟一向篤信風水命理，依家《太陽報》逢周五送《好報》，咁啱就出現三個太陽照耀大地嘅天文奇觀，睇嚟佢哋正如日方中，我哋真係凶多吉少，你叫小弟如何不憂心？」

少膽虫一聽，即刻怯到打咗個尿震，「唔會咁準啩？」肥豪一聲冷笑︰「哼，寧可信其有，不可信其無，你睇淫賤黎先喺台灣敗走，《爛果》又蝕錢蝕到嚇死人，你又點解釋呢？」少膽虫愈聽愈覺得有道理，但係又覺得有啲奇怪，「好喇，我當你天上一個太陽，手上一份太陽，咁都仲差一個太陽先符合呢個現象喎！」

肥豪望住少膽虫，一臉不屑咁話︰「有人曾經用太陽嚟形容偉大嘅領導，所以……」

呢個時候，淫賤黎推開大門行入嚟，「偉大嘅領導，講緊我呀？」少膽虫同肥豪頓時面面相覷，雖然唔知肥豪諗緊啲咩，但少膽虫喺心入面只有一個想法︰「傻的嗎？」