政壇：政商定格：高永文大仔觀鳥紓壓

醫療專業人士協會日前舉行年度盆菜宴，一眾名醫、高官同逾千長者提早做冬。做官之後忙到甩碌嘅高永文、港大校務委員會主席梁智鴻（金刀梁）都應邀出席，高永文大仔高偉琛（Koel）仲捐出自己嘅珍貴雀鳥相片製成月曆義賣，每個只售三十元，截至大會當晚已成功籌得二十萬元。

有意繼承父業嘅Koel話，近來為準備港大醫科考試少咗時間影相，但依然定期跟香港觀鳥會去觀鳥，佢笑言女仔鍾意行街買嘢紓壓，佢自己就選擇賞鳥。年過七十歲嘅金刀梁好精靈，影完大合照竟然直接喺高台跳落地，聖誕佢同高永文一樣冇得放假外遊，佢話港大正物色新校長、副校長同兩個院長，根本行唔開。