政壇：搞搞政：大輝講佛偈廠商會唔撐

特首梁振英（CY）日前出席立法會答問大會，就山頂大宅有僭建物一事接受質詢，代表中華廠商聯合會嘅立法會議員、有「唐英年家臣」之稱嘅林大輝喺答問大會上大講佛偈，更以「昨日的因、今日的果」揶揄CY當日對唐唐嘅行為係「因果循環，報應不爽」，點知佢講完佛偈唔夠二十四小時，廠商會已經高調發稿力撐CY，明言「繼續支持以行政長官梁振英為首的新政府依法施政」，林大輝呢次算唔算畀幕後「老闆」掌嘴呢？

廠商會嘅聲明話，CY已就僭建事件向全港市民道歉，希望事件可告一段落，各界以大局為重，從香港整體利益出發，避免引發任何管治危機。我哋問過廠商會會長施榮懷，佢聲稱今次出稿已醞釀咗一段時間，咁啱喺尋日朝早開會確定字眼，並非針對林大輝嘅言論，同林大師一樣支持過唐英年嘅施榮懷強調，特首選舉已經結束，唐營梁營早已不存在。

不過細睇廠商會嘅聲明同林大輝嘅「僭建報應論」，實在係大纜都扯唔埋一齊，睇嚟，喺立法會大講六祖慧能禪語嘅大輝修行仲未夠。今日立法會就會辯論對CY嘅不信任動議，大輝使唔使悟吓，點樣可以體面地以今日的我打倒昨天的我呢？