政壇：何啟聰踩過界寫食評

投資銀行出名壓力大，所以從業者各有減壓良方，瑞信香港認股證及牛熊證銷售主管何啟聰（Ivan）就鍾意辛苦工作後食餐好嘅。除推介窩輪外，原來佢仲寫埋食評添。鍾情日本菜嘅佢仲話，近排米芝蓮出咗新一批推介食肆，部分佢都去過，但覺得米芝蓮推介嘅日式餐廳唔多，應該要發掘多啲喎！

Ivan話生活各大項目中，除「住」以外每月最大開支就係「食」，佢逢周日必到未去過嘅餐廳試菜。唔好以為佢唔貴唔食，佢揀食嘅一大原則就係專搵品質高、但價錢實惠嘅食肆，即所謂超值之選。佢會參考唔同飲食雜誌、網站上嘅相片，睇吓食物夠唔夠新鮮（尤其日本菜）、擺放有冇心思、以至餐廳為食物提供乜嘢配料等，都可反映出廚師對食物嘅質素有幾高要求。

佢仲以天婦羅為例，話高質素嘅食肆係會提供唔同嘅鹽（如綠茶鹽、咖喱鹽）畀食客配搭，而唔單止係一般嘅天婦羅汁同蘿蔔。