政壇：曾浩輝左麟右李好有緣

已請辭嘅衞生防護中心總監曾浩輝仲有十七日就離開政府，近排佢因為父母恨飲新抱茶，多咗個花名叫「筍盤」，尋日衞生署署長陳漢儀宴請傳媒，結果畀「筍盤」搶晒鏡，出席嘅人個個都追問佢有咩大計，佢透露嚟緊有表演，又想學寶石鑑賞，仲想學吓講股添。

曾浩輝從醫出色，仲彈得一手好琴，遲啲佢會為母校香港華仁書院籌款表演，與「校長」譚詠麟合作，屆時譚校長會唱首本名曲《霧之戀》，而佢就負責彈琴。唔講唔知，曾浩輝讀書時歌手李克勤係佢師弟，兩個一早已經夾過歌喇，似乎佢同左麟右李都好有緣。

佢又自爆間寡佬屋收藏咗二百粒喺ebay買返嚟嘅寶石，因為佢對寶石好有興趣，想正式讀個課程學鑑賞寶石。究竟點解石頭會成為佢嘅興趣？佢話可能細個睇過媽咪粒鑽石，愈睇愈鍾意。投資有道嘅曾浩輝仲話，想拜股評家「青姐」胡孟青為師學炒股，如果佢用講股口脗嚟解釋傳染病走勢，相信都幾過癮。