政壇：白鴿假改革真內鬥

立法會選舉結束以來，白鴿黨領導層就陷於風雨飄搖之境，隨住黨內選舉期近，形勢更加混亂。最新消息卻係白鴿黨主席又係老人之爭，單仲偕雖然宣布以十二人內閣形式參選，但做開代主席嘅劉慧卿就話會單挑單雞，後尾又有南區年輕區議員區諾軒報名湊熱鬧。反而之前話要競逐副主席嘅胡志偉就分分鐘喺新一波戰事中出局，白鴿黨上下內鬥互揪，足證內部分裂真係好嚴重。

胡志偉無影

單雞尋日以大熱門姿態帶同十一位兄弟亮相，佢嘅副主席人選有老有嫩，好似四十五歲嘅社運老手蔡耀昌同二十八歲嘅南區區議員羅健熙。同樣屬於老鴿嘅張賢登就會選秘書長。個名單冇胡志偉個名，咁話明報咗名選副主席嘅胡志偉係咪同人唔啱呢﹖

而早前講咗「裸退」嘅卿姐就發聲明話，依家只得單雞一人參選主席，好多黨友都覺得要有競爭嘅選舉，所以佢出嚟畀個選擇大家。據聞卿姐同單雞都唔太想做主席，希望有後生仔接棒，但結果卻係佢哋又挽起衫袖落場砌，引嚟白鴿大佬輩惺惺作態多過有心推行改革嘅批評。

其實白鴿新丁唔爭氣都有責任，有議會一舊雲之稱嘅黃碧雲本來係最早傳出榮升新人王嘅人，但佢喺議會質詢唔到題、論政未見出色，更鬧出投票撳錯掣事件，逐漸遠離寶座。至於胡志偉亦被指上又驚、落又慌，呢場選舉星期日就有結果，且睇白鴿嘅改革有幾成真。