政壇：政商定格：鄭錦鐘慕名歎佳釀美食

新一期米芝蓮指南日前出爐，其中位於紅磡海名軒嘅中菜餐廳「玉蕾」，新上榜摘下一粒星美譽，即時聲名大噪。保良局副主席Eric鄭錦鐘早前就拖埋太太慕名而來，大歎紅白美酒配精緻中菜，大飽口福之餘，仲跟隨世界排名第四嘅日籍品酒師野坂昭彥，參觀餐廳內價值二億元嘅酒窖，大開眼界。

曾跟過國際知名酒評家Robert Parker（RP）學習品酒技巧嘅Eric，當日點咗七道菜嘅wine tasting菜單，由日籍大廚操刀。一道香炸大閘蟹蓋，蟹肉同蟹膏比例剛好，入口鮮嫩滑溜。另一味窰烤煮松子肉，做法似乞兒雞，將肥美豚肉以荷葉同厚鹽蓋住，荷葉香氣逼人，豚肉鬆化甘香。每道菜分別佐以不同佳釀，由清香白酒漸進至濃郁紅酒，其中一支來自美國Napa Valley嘅DuMOL Aiden Pinot Noir2009，RP評分高達93分，年產只有四千支，入樽時刻意省卻隔渣程序，令酒香更豐腴誘人，享用前雪凍五分鐘風味更佳。