政壇：搞搞政：吹雞遊行冷清白鴿瘀爆

白鴿黨前日搶閘，諗住為該黨議員胡志偉聽日提出對梁振英不信任動議造勢，搞單「聖誕快落台」倒梁遊行係威係勢，出動埋該黨新成立嘅創意媒體部搞文宣，企圖抽水，攞番個彩，但係遊行篤到盡都係得八百人參與，連原先預計嘅一千人都冇。有網民更恥笑白鴿黨做咗二十幾年民主「生意」，吹晒雞都動員唔到百分之一嘅支持者出嚟撐場，根本曲線示弱挺梁咁話！

自從喺立法會選舉失利後，白鴿黨眼見社民連同人民力量等泛民分裂出嚟嘅激進派，雖然窮到褲穿窿，既冇蛇齋餅糉，亦冇肥佬黎捐款過千萬關照，但號召力依然驚人，好多仲「升呢」做議員，一眾老鴿決定動起來，可惜效果差強人意。

好似星期日嘅倒梁遊行，班老鴿分明係見民陣率先宣布元旦日搞，為咗攞彩就拿拿聲申請搶先舉行遊行，結果佢哋公布話有八百人遊行，警方就話只有三百，最後連網民都譏笑白鴿黨做場咁嘅大龍鳳，自己友都唔call齊出席，要好好檢討，仲揶揄佢哋橫掂都係咯，應該call多啲公公婆婆出嚟，點都砌夠佢一千人。