政壇：青聯留位洩推薦名單

香港青年聯會尋日舉辦座談會，畀參選今屆港區全國人大代表嘅候選人講吓政綱同理念。不過，會場入面竟然掛出一塊只有三十六個空位嘅紙牌，而且最後出席呢個座談會嘅候選人數又咁啱只有三十六人，唔通呢個就係坊間流傳嘅「推薦名單」？

主辦單位就話喺邀請各候選人出席後，只收到近三十位回覆，再預多幾個位畀啲冇覆但又會臨時出席嘅候選人，咁咪喺紙牌上留住三十六個位先囉！

喺近兩小時嘅座談會，而各候選人發言時除將功績「晒冷」外，仲各具特色o架。如「愛國歌手」張明敏雖然冇唱歌，但喺講到希望推廣普通話普及化時，即時「轉台」講普通話，而保安局前局長李少光喺發言入面除講理念外，仲順便回應埋傳媒嘅報道，話有報道指佢唔關心內地發生嘅事，呢啲只係因為佢尊重「一國兩制」，所以唔回應唔代表唔關心喎。