政壇：陳裕光將抱孫好事成雙

近日見到大家樂集團主席Michael陳裕光兩夫婦，都笑到蓮子蓉咁嘅面口，梗係啦，愛女Candice陳浩寧身懷六甲，再加上囝囝陳浩弘同太太Jaclyn都造人成功，新抱已懷孕三個月，即係話，Michael做完公公後接住又做爺爺，真係好事成雙。

Michael太太羅寶靈話，浩弘比Candice早半年結婚，估唔到妹妹爬咗阿嫂頭先懷孕，兩人生B時間咁相近，到時一連增加兩名家族成員，屋企肯定好熱鬧。佢話細B只有三個月，暫未知係男定係女，但佢有叫Candice同新抱多飲牛奶補鈣兼增強抵抗力，依家兩個都佗得好好。