政壇：譚志源考起功能界別

中央批准香港最快喺二○一七同二○二○年實行雙普選，而作為普選中途站嘅二○一六年立法會選舉喺時間上更為迫切。政制及內地事務局局長譚志源早前就向多名建制派功能界別議員開出難題，叫佢哋認真諗吓點樣擴闊所屬界別嘅選民基礎，供政府做新一輪政改諮詢時參考，但改革嘅大前提，係要同時保住工商界同建制派喺界別內嘅優勢，令部分議員諗爆頭都諗唔到答案。

目前二十八個傳統功能界別，當中有十九個以團體票或公司票為主。有建制派功能界別議員同我哋講，要將團體票或公司票變做個人票，技術上並唔困難，只要將一團體一票變做一會員一票，同埋將一公司一票變做一董事或一員工一票，即能大幅增加選民人數，但咁做肯定會大幅改變有關界別嘅選民結構。以選民人數最少嘅金融界同保險界為例，如果所有銀行員工同保險從業員都有票，過往主導選舉賽果嘅銀行家同保險公司老闆定必失勢，變成由中產甚至基層員工主導，工商界肯定唔會支持。

採個人票隨時益泛民

最重要嘅係，今屆九個主要採用個人票嘅功能界別，當中六個都由泛民當選，餘下三個工程、建築同醫學界，建制派亦贏得好辛苦。大幅放寬其他界別嘅選民資格，隨時令泛民贏得大部分功能議席，令特區政府施政更加困難，中央同建制派都唔想見到。

考官出題目，考生唔識答，可以點？其中一個方法就係罷答罷考！有建制派議員表明，市民同泛民最關心嘅係二○一七同二○二○年終極普選方案，例如特首選舉提名委員會點樣組成、立會普選係咪等於廢除任何形式嘅功能界別等，對二○一六年呢個中途方案未必好上心。與其為政改而政改，最後整個大頭佛出嚟，不如乜都唔好搞、原地踏步至二○二○年先一鋪過改革好過！