政壇：政商定格：張茵甘做飛人見小股東

做得上市公司揸弗人，日常嘅行程都相當緊湊。玖龍紙業董事長張茵尋日就風塵僕僕咁，嚟咗香港出席股東會，唔知係咪要趕飛機走嘅關係，發現平日鮮艷又珠光寶氣嘅張總，今次打扮比以前低調咗，捨棄紅色改着藍色套裝出嚟見小股東。

玖紙股東會比公關講嘅時間早咗半個鐘完，張總一坐低就話尋日先喺美國飛返嚟，依家又要趕去機場搭飛機走。雖然要做「空中飛人」，但張總繼續以招牌笑容出現，可能同公司經營好轉有關。佢話公司的低谷已經過咗去，雖然原材料價格仲有啲波動，不過銷售非常好，九月底後仲開始提高銷售價格，到依家為止累計加幅介乎每噸五十至一百五十元人民幣不等。