政壇：政商定格：帆船賽第二謝鴻興話好彩

香港遊艇會凡周末都舉行帆船比賽，上周六喺帆船船群中發現香港醫學會會長謝鴻興，原來佢同五名志同道合嘅帆船發燒友參加兩場港內帆船比賽，由紅磡出發到太古城，再到啟德舊機場，然後再折返紅磡終點。當日謝醫生嘅最佳成績係第二名，佢講笑話：「好彩得第二，如果攞第一，就要請飲啤酒喇！」

謝醫生話同隊友控制艘船反應要好快，要因應風速、風向同水流，令船身穩定前行，仲要避開其他帆船，加上比賽要快，慢少少都會輸。雖然佢負責控制主帆，但拉帆嘅繩拉緊或放鬆一、兩吋，艘船航行情況就好唔同，真係少啲功夫同合作默契都唔得。

唔講唔知，謝醫生原來係學會嘅航海隊長，同好多會員都有出海比賽。點解咁鍾意玩帆船？佢嘅答案就係「好玩」，因為出海要睇天時地利，而且消耗唔少體力，係一種好吸引嘅運動，團隊精神更加唔係其他運動可以學到，真正體會乜嘢係「坐埋一條船」喎！