政壇：搞搞政：立會七怪公屋區搵中產票

喺新一屆立法會開鑼後，由梁君彥為首嘅七名工商專業界議員亦組成聯盟，佢哋大部分係來自功能界別。據聞佢哋最近都靜極思動，除咗密密搵友好加盟做佢哋顧問智囊外，疑似連地區直選都想染指，所以早前派出梁君彥同身兼行會成員嘅林健鋒等四人出擊抽房屋署空置嘅屋邨議員辦事處，搶灘意味認真濃，顯然係想增加本身嘅政治影響力。

之不過，咪以為想搶灘插旗係咁易，事關房署嘅屋邨辦事處抽籤次序，功能界別議員係排最後，「七友」原本抱住有好過冇嘅心態，有殺錯冇放過都係人之常情，最弊係唔知「七友」係事忙定係未瞓醒，後期先至發覺去公屋區搵中產票係唔可行嘅。吓！去公屋區搵中產票，佢哋係咪未瞓醒呀？咁古怪，「七友」應該叫「七怪」至啱。就因為咁，最後嘅結果當然係揀唔落手，空手而回啦！