政壇：皇仁籌款晚宴一票難求

皇仁書院後日大搞籌款校慶晚宴，歡賀學校成立一百五十周年。皇仁舊生會會長于鎮康同校慶晚宴籌備小組召集人鍾創新，為咗籌備晚宴絞盡腦汁，但講到晚宴一票難求，要臨時加枱兼且一張枱坐足十三人，變多六百個位出嚟，先招呼得晒二千四百名同學及校友，所以幾辛苦都冇所謂啦！

當晚出席嘅校友粒粒皆星，包括金管局總裁陳德霖、食物及衞生局局長高永文、中文大學校長沈祖堯，佢哋仲會登台獻唱添！為咗籌得更多款項，好多社會名人都捐出拍賣品，包括「富豪飯堂」福臨門捐出酒席券、國學大師饒宗頤捐出筆題「皇者仁風」字畫，以及有十枚陀飛輪腕錶等，相信屆時必定爭崩頭。