政壇：阿柱讚對家孖寶有紋路

工聯會喺今屆立法會有三名新丁，其中女將麥美娟因參加過多場直選論壇，知名度相對較高，但另外兩名「男丁」鄧家彪同郭偉強，就因為來自勞工界功能界別，而且又係自動當選，至今仍然有好多人唔認得佢哋，早前立法會啱啱開鑼，就試過有舊議員認錯佢哋。不過，工聯會嘅死對頭、工黨議員張國柱，就大讚呢對孖寶講嘢有紋有路。

點解佢哋令阿柱另眼相看？阿柱話佢哋都係社工出身，又讀過大學，待人處事都比較講道理喎。阿柱本身代表社福界，社工係佢嘅選民，自然要擦吓班米飯班主鞋啦，但佢呢番言論，亦可以理解為暗踩其他非社工出身同冇讀過大學嘅工聯會議員，全部都唔講道理囉！