SUN世代：無限創作 潮爆停不了

潮流創作人蘇卓航(Eric So)，又名蘇勳，最為人熟悉的，是他做的李小龍Figure，但後來又陸續出現蘇勳眼鏡手錶衫褲波鞋，每件事看似不大相連，但都離不開個「玩」字。玩了多年，他依然不定性，帶着「無法之法」思想，為要造出「無限之限」創作。

「潮流就是比其他人行前少少。」在香港未有人做Figure公仔時，他就開始做，更造出一系列李小龍Figure，在潮界一炮而紅，衝出香港，在日本和美國搞Figure展。Eric So 的名聲傳至海外，商品、潮牌紛紛找他Crossover合作。雖然做過不少Figure，但李小龍系列對他意義最深，不但為他帶來工作名利，更成就他的個人昇華。

Eric自言算不上是李小龍忠實粉絲，但留意到他對世界的影響，從未因離世而消失。當Eric閱讀完李小龍的傳記和了解其思想後，更從中領悟人生，「截拳道功夫哲學係『以無法為有法，以無限為有限』，面對問題，唯一方法就係唔好設定方法，你唯一要比自己嘅限制，就係唔好去限制自己。」

許多名人成功故事都說：「當找到自己的長處和興趣，就專心致志，繼續發展！」但此成功方程式卻不適用於Eric，以Figure玩具起家，卻未有想過就此停留，「Figure可以等於Eric So，但Eric So唔只係Figure，可以等如好多好多嘢 ，就算叫我整飛機都得，只要你信我就得。」

所以，他以創作人自居，從不定位自己。Figure玩具，做夠了，他就去做眼鏡、手錶、時裝，打造出多個潮牌。只要好玩，想得到，做得到，甚麼也可試，「都有人同我傾生意，同設計無關，我又無所謂，諗吓噏吓之嘛！」或者，這個態度，就很「Eric So」。

在香港，曾幾何時有過一段Figure熱潮，潮來，很快就潮退。但打開潮流雜誌，Eric So好像不曾在潮界靜下來。九六年，他以個人名義出道，來到今天，由靚仔變靚佬，行年四十有多，裏裏外外仍是型人Icon，「創作靈感來自生活，我唔會話呢啲嘢唔吸引就唔睇，假設太多，會成為障礙，保持對個世界八卦，先整到唔同年代嘅人都鍾意嘅嘢。」

今年的聖誕，他首次展出過往經典作品，首辦模型限量矜貴，Figure迷千方百計要儲齊珍藏，Eric卻少有保存自己作品。為這次展覽，他要反過來找好友幫手集齊展品，「我個人唔懷舊，只會念人情嘅舊，唔念物件嘅舊，因為前面新嘅嘢永遠係最好嘛！」

Eric's Profile

現職：Papamamason創作總監

興趣：雕塑，畫畫，足球