政壇：搞搞政：葉國謙獨裁者上身

立法會保安事務委員會尋日討論截取通訊及監察事務專員嘅周年報告，起初一直相安無事，但到工黨何秀蘭問及如果執法人員有違規行為，當局會有何處分程序時，保安局局長黎棟國回應有關提問，之後甚至想交畀保安局副秘書長再作闡釋時，點知委員會主席、建仔嘅葉國謙突然「獨裁者」上身，以五分鐘時間已到為由，連官員想再作解釋嘅機會都變相「封殺」。

隨後再有泛民議員追問執法人員喺截取通訊時嘅心態問題，該議員不滿當局未有回應提問，要求主席再給予時間解答，阿謙竟然一聲「好」，旋即將發言權交畀另一名議員，做法令人側目。

輪到建制派嘅議員林大輝要求當局，將入境處管制站運作嘅新出入境管制系統嘅比較資料數據交畀議員時，阿謙竟然以「夠鐘」為名話唔可以，搞到大輝都按捺不住疑向佢抗議話：「主席，你唔想知吓個比較o架咩？」阿謙隨後堅持己見話，雖然佢都想知，但實際唔可以，反促當局書面回覆議員。睇嚟佢繼續以此高壓手段主持會議，畀自己友鬧爆外，睇怕遲啲仲會畀泛民啲「重炮手」重點招呼佢。