政壇：鄭明訓出錢出力撐社企

思捷嘅供股計劃已告一段落，前大股東邢李火原失驚無神又做番思捷嘅主要股東，坊間對佢嘅遐想又點會少吖。思捷非執行副主席鄭明訓話，如果邢生重返思捷董事會，佢表示歡迎，到底會唔會重返，就真係要問邢生本人咁話！

鄭明訓一早「閂閘」話唔講思捷嘢，但講番思捷個品牌就多啲嘢講。查實佢好落力幫思捷搞新意思，尋日佢明明係幫一間叫L plus H Fashion嘅社企做宣傳，最終都話將來會介紹思捷管理層嚟參觀，希望兩者之間日後會有合作。

呢間社企嘅產品全部香港製造，兼請咗唔少老一輩嘅「工廠妹」幫手，依家佢哋就搞緊個毛衣捐贈活動，有成幾千件衫送畀唔同團體，當中鄭生係贊助人之一。鄭生話後生時吃過苦，依家就生活得自由，所以時不時諗下點樣去幫助社會上有需要嘅人，經介紹之下就認識咗呢間社企，覺得企業唔好淨係為賺錢，亦要為社會做多啲事，佢除咗出錢之外，仲出力叫啲商界朋友幫手添！