政壇：阿牛一日連瘀兩鑊

趁住尋日朝早召開行政會議，社民連「阿牛」曾健成拉埋幾個街坊去請願，要求政府喺柴灣增建升降機，由於佢帶去嘅請願道具太大，一度被拒門外，搞完一大輪先成功進入特首辦請願。但期間阿牛只掛住喺傳媒鏡頭面前伸冤告狀，就連行會成員胡紅玉經過都見唔到，最後仲要胡紅玉親自拍吓佢，佢先醒水，再手舞足蹈重新申訴多一次，真係瘀到爆。

喺行會瘀完，之後喺法庭又有單官司令佢瘀多鑊。話說佢喺舊年東區區議會選舉落敗後，因不服選舉結果而提出選舉呈請，直到月前佢評估過勝算後決定撤回選舉呈請，尋日開庭處理有關撤回申請。雖然阿牛冇到庭，但佢嘅代表律師就被法官訓話，指有關呈請處理拖得太耐，又冇解釋，實在「慘不忍睹」，認為涉及公眾利益嘅事情應盡快處理。

阿牛單官司之所以拖咁耐，原來係幫佢打官司嘅何俊仁律師行喺處理上有甩漏，過程中送漏咗文件畀民政事務局。阿牛嘅代表律師就解釋，佢只係義務幫阿牛，結果被法官訓斥話，呢種態度一定要改，事關義務都要盡力，否則踐踏義務嘅意義。阿牛一日內連瘀兩鑊，確係出師不利。