政壇：林鄭享受做寂寞推銷員

人稱「好打得」嘅林鄭月娥攀上一人之下萬人之上嘅政務司司長之位，原來簡單如整一個PowerPoint仍然要親力親為，原因只有一個，仲要係林鄭自己講嘅：「no colleagues will actually read my mind（無同事能明白我）。」聽起嚟佢似係好寂寞噃，不禁令人輕嘆一句，誰明林鄭心？

林鄭尋日出席由香港貿易發展局及環球香港商業會聯盟主辦嘅「香港論壇」，向數百個外國商界領袖推銷香港，聯盟主席George Legros介紹林鄭出場時就感嘆，新政府上場後不論喺傳媒定立法會都唔見得一帆風順，令人深表同情。

幾個月瘦咗成個圈

不過，做咗幾個月就瘦咗成個圈嘅林鄭，出場時就仍然亢奮非常肉緊，仲親自整個十幾版PowerPoint，話要畀班商界領袖一啲視覺享受喎！PowerPoint最後就有一張領導人今年回歸紀念訪港期間同林鄭嘅合照，照咁睇個PowerPoint似係滿足林鄭自己多啲。

其實PowerPoint冇乜驚喜，只係介紹吓六大產業同CEPA，又提吓政府喺增加土地供應、推行環保嘅政策，大部分內容都係舊調重彈，中間再攝一啲佢之前訪問倫敦嘅工作匯報。

跟住佢愈講愈起勁，仲話香港其實有好多發展機遇，而政府亦做緊好多嘢，之不過有好多人即使有心睇報紙都唔會發現，所以叫台下咁多位商界領袖要同佢一齊幫手推銷香港。唔通佢覺得自己係個寂寞嘅推銷員，要搵人陪佢一齊做？

誰明林鄭心

主唱：林鄭月娥

可以笑的話　不會哭

可找到知己　那會孤獨

偏偏我永沒有遇上

問我一雙足印的風霜　怎可結束