政壇：搞搞政：年年估錯數鬍鬚曾認衰

財爺鬍鬚曾過去咁多份預算案都估錯數，喺尋日嘅立法會財經事務委員會會議上，工聯會王國興先嚟語重心長問佢今年有冇新招，點知佢大耍太極，阿王惟有拋低一句政府唔好過分樂觀。

建制搭台唔領情，跟住輪到泛民發炮，工黨李卓人話鬍鬚曾做咁多年財爺就被人鬧足咁多年，又彈佢呢個「保守財爺」正一守財奴，一句量入為出、財政審慎，搞到香港未有財政懸崖先有貧窮懸崖。點知鬍鬚曾笑笑口回敬：「多謝李議員歷年提醒，作為一個財政司司長，畀人話保守我覺得係讚美嚟o架！多謝你！」

公文袋郭榮鏗就質疑點解政府唔學美國做個有深度長遠嘅估測，估下未來二十年嘅發展開支，點知鬍鬚曾就軟皮蛇咁話嗰啲只係「政治掛帥」嘅估算，「二十年預測都係呃人o架！」

最後搞到委員會主席、身兼行會成員嘅建仔李慧琼都忍唔住問其實政府連年估錯數，究竟當中有乜困難呢？政府會唔會請個顧問研究下點解呢？點知佢話香港屬外向型經濟，估算一定有落差，仲話連外面會計師樓嘅預測都唔見得比政府預算準確。即係話打定輸數，點估都係錯o架嘞！