政壇：KK間接認「累死」譚國僑

早兩日民協喺東莞搞咗場兩日一夜嘅集思會，檢討立法會選舉九西老巢失守之謎。循區議會超級議席進身立法會嘅KK馮檢基話今次失守有「兩大死因」，首先係佢初時執意留守九西，但隨住佢發現知名度喺特首初選後有些少進帳，先諗住盡地一煲轉去選超級議席，亦都係因佢揸唔定主意，搞到譚國僑最後要喺九西出選，唔夠時間落區深耕細作。輕描淡寫咁間接承認自己有份整死譚國僑。

KK話，另一死因係民協過分集中地區工作，對所有社會議題都係「零反應」，當九西其他對手喺立會選舉期間疾呼反國民教育、對抗赤化時，民協冇喺呢啲有利泛民嘅議題上分一杯羹，令譚國僑跑輸大市。

佢話民協未來會加強政策研究工作，又會提升對社會議題嘅敏感度，下星期六召開中常委時仲會要求其他執委提供改革建議。至於有乜好建議打頭陣，佢就話「未諗到」。其實呢啲結論唔使去東莞集思都知，仲要煞有介事開會，可想而知民協有幾大問題。