SUN微博：打橫嚟講：香港的「過骨主義」大晒

只不過回歸十五年之嘛！香港以前引以為傲的叻人精英，全部唔知去晒邊？一下子消失得無形無相。呢個特區廢墟，由政府部門到民間機構，都無晒識做嘢嘅人才，將來唔知點算！

梁振英特首畀呢班庸官弄得面白頭灰，佢下邊班嘍囉，好心加把勁，醒啲當幫助啦！依特首吩咐「開誠布公」，在適當時候，做適當的事便是了！就算做得唔好，也不該做啲低能事，幫倒忙，在傷口灑鹽，添煩添亂吧！

嗱！我講緊的，係那個烚吓烚吓的屋宇署，明明六月時已發現梁宅有「地下室」，好應及時早響「布公」啦！係要逼到特首在今天難敵悠悠眾口之質疑，最衰都係屋宇署班廢柴！咁都未算差呀！呢個部門阿頭龜縮不蒲頭解釋，再燒着埋林鄭同陳茂波後，那位署長區載佳才「出來」解畫，本來，大大方方向公眾說清楚咪叻仔囉！唉！點知呢班庸才只Call電子傳媒到場，而特登不通知報章記者，兼且署長只宣讀貓紙聲明，不接受提問便轉身離去，咁嘅「工作」態度，又收廿萬一個月，係咪死得呢？事後，屋宇署又講大話，否認曾主動邀請傳媒喎！真不知所謂！

香港官員現在活在「過骨主義」世界裏，佢哋深信港人是善忘，而只追看下一劑大鑊嘢的，所以過咗骨後，就無人追究的了！

咁不尊重記者，不尊重傳媒，不尊重市民的知情權，呢啲官，食乜大o架？死未？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

email：sunweibo@opg.com.hk

「就係敢爆」網址tv.on.cc/hot