政壇：政商定格：許曉暉諗定囡囡學詠春

唔少在職媽媽都有一個煩惱，就係點樣抽時間親子，民政事務局副局長Florence許曉暉都唔例外，但佢有奇招應對。

為免兩個囡囡過分依賴，變成一個乜都唔識嘅港孩，Florence一有時間就會帶囡囡去街市見識吓，仲會不時「獎勵」囡囡，同囡囡一齊沖涼！佢話會趁沖涼時間教埋囡囡洗衫，依家佢七歲大嘅女已識得自己洗手巾仔同底衫仔。

Florence話見到太多怪獸家長嘅反面教材，所以囡囡一切活動都係興趣先行，而且好注重小朋友嘅身體健康，佢早就諗定安排囡囡學一種運動，遲啲等囡囡大個啲、手腳協調得好啲，就會安排佢哋學吓詠春，有助伸展筋骨。