政壇：泛民分身攻陷長津公聽會

只係一個社民連立法會議員「長毛」梁國雄，就玩殘勞工及福利局局長張建宗同其他六十幾位議員。雖然長毛唔識分身術，但佢有幾位泛民盟友就精於此道，每次立法會舉行公聽會，都派出大批黨員、職員同支持者，以唔同身份出席發言講埋同一樣嘅嘢，務求自製民意同消耗大家時間，做法仲陰濕過明刀明槍嘅拉布戰！

立法會福利事務委員會早前就長津撥款先後舉行咗三場公聽會，合共有一百零一個團體代表出席，但當中唔少都係嚟自同一個泛民黨派或組織，來來去去都係嗰班人，講嚟講去都係反對資產申報制度同爭取全民退休保障。例如近年新成立嘅激進八、九十後組織「左翼廿一」，就分別以「左翼廿一」、「左翼廿一勞工部」、「左翼廿一青年部」同「左翼廿一生產部」派人發言，一分為四。

白鴿黨更離譜，佢哋喺立會已有六名議員，仍以該黨名義派多一名代表出席公聽會；佢哋嘅多名區議員，又以自己嘅區議員辦公室名義出席。已有四名議員嘅工黨同關係密切嘅職工盟亦有類似情況。張建宗好應該效法警察交通部，整番幾個紙板局長公仔放喺立會聽會囉。