SUN微博：少膽虫手記：《好報》難求

自從尋日少膽虫口誅筆伐淫賤黎之後，個心都驚驚哋，上網睇吓咩反應嗰陣，畀少膽虫發現咗個影射我嘅專欄，叫咩《沙膽雄手記》喎。一睇，無咩料到咁，就諗住算啦，點知睇清楚，原來係爛果網站出錯！少膽虫打內線都慳番，即刻嬲爆爆咁去搵IT部門啦，點知一去到門口，好似去咗靈堂咁，一大條白布寫住「壹全霉千古」，有幾口棺材擺喺度，仲見到淫賤黎添。少膽虫出名少膽，見到老細就更加腳軟，即刻個人謝晒。淫賤黎見到我就嗌：「少膽虫！啱喇，你幫手試吓邊個舒服啲！」

少膽虫當堂嚇到魂飛魄散，央求淫賤黎放過我，就話：「少膽虫上有八十歲少老母，下有三歲小小虫，唔想死住！」點知淫賤黎話：「唔係你死，係我死呀！」之後佢拎咗份報紙出嚟。唔係講笑，即刻感覺到有陣唔屬於堆填區、心曠神怡嘅氣息湧現，成個人好似聞到一陣青春活力嘅味道。原來，係正義傳媒新出嘅《好報》！

淫賤黎小心翼翼咁畀份《好報》少膽虫睇，唔睇猶自可，一睇就見咁多猛料，睇到我心驚少膽跳。「咁好睇嘅雜誌式刊物，真係無改壞名！」少膽虫閱後不經意大讚，即刻後悔講錯嘢。之但係淫賤黎無嬲，仲話：「你話我點可以唔死？所以我先至賣爛果，同人換番個棺材咋！」少膽虫都實在無咩可以講，只好用語言偽術兜番：「雖然對家形勢大好，但不涉及爛果跌紙問題。」

淫賤黎聽完唔出聲，只係想拎番份《好報》返去再睇。少膽虫不知哪來嘅勇氣，手上竟不由自主咁抗拒，可能係因為每次要等到星期五先可以買《太陽報》附送，因此畢嬲少膽嘅我，突然多咗個膽，身體上居然排斥任何想拎走《好報》嘅力量，即使佢係淫賤黎！

「嚓」一聲，少膽虫同佢各執一半。可能因為我哋真係無咩好心，所以無《好報》睇啦。唉！