Sun奇古怪：Sun潮語【甩轆】

職業司機日日喺公路上做嘢，遇到意外嘅機率比平常人大好多倍，加上香港人出名為兩餐為搵食，職業司機大佬為搵多一個幾毫，可以自殘方式不眠不息，大大增加道路上嘅風險。

但有時交通意外真係避無可避。好似早幾年，經常有重型車輛喺公路行緊嘅時候突然輪胎飛脫，即係廣東話所謂嘅「甩轆」，輪胎飛到對面馬路，擊中其他車輛導致車禍，呢啲人算不如天算嘅飛來橫禍，真係想走都走唔甩。「甩轆」近年仲成潮語，但意思就同交通事故無關。

「甩轆」嘅意思係形容一啲人工作上完全無責任感同無交帶，託付咗嘅事情經常完成唔到，甚至令工作計劃泡湯，拖累同事累朋友累街坊。

不過 「甩轆」亦分為偶然性同長期性。有啲人間唔中「甩轆」一次半次，都仲情有可原，值得理解同同情。但有另一類人，係屬於天生「甩轆」精，非常信唔過，交畀佢嘅工作永遠死拖爛拖，拖到最後一分鐘先交貨，甚至求其交貨，或索性唔交貨不了了之……呢類「甩轆」人士，可以嘅話係會列入黑名單，永不錄用。

「甩轆」呢個潮語可能係嚟自 「甩期」，因為好多工作都有時間表或者timeline，如果未能按時完成工作，就會稱為 「甩轆」，即係甩咗個期。同時 「甩」亦有一種唔穩陣嘅感覺，所以啲人甩吓甩吓講吓講吓，就變咗「甩轆」。「甩轆」嘅情況喺創意行業特別普遍，因為創作嘅人有好多都係比較自我，同唔理別人感受，加上有啲創作人不太重視規則與紀律，做嘢講feel講靈感，以致時有 「甩轆」嘅情況發生。問我點解知?因為我哋都甩轆個囉!