政壇：政商定格：葉志禮大搞品牌年輕化

豪特保健上市至今都未足一年，但業績走樣、股價長期潛水呢啲問題就有齊晒，認真令小股民牽腸掛肚。尋日見到佢哋CEO葉志禮，佢話暫時仍然係公司播種期，希望大家畀啲時間佢哋。

葉志禮又話一路以來，OTO產品都係重視內在美多啲，仲話行內人都覺得佢哋產品嘅功能得，只係冇咁重視包裝；為咗同對手有更大差異，佢哋決定明年開始會重新包裝形象（rebrand），將形象年輕化，唔單止產品設計，就連店舖裝修都將會變，而且仲諗住搵後生啲嘅代言人添。

講到業務大計，佢話會繼續增加內地分店，由依家五十五間，到出年三月就會增加到八十間，再下一個財年就會有成一百二十間咁多。到時相信公司喺香港同內地嘅收入可各佔五成，開始享受收成期。