政壇：搞搞政：張建宗蘇錦樑 未搵啱左右手

政府短時間內就會公布新一批副局長同政治助理名單，尋日就再公布食物及衞生局聘任多一名政助，但未有副局長嘅勞工及福利局同商務及經濟發局依然未有着落。

消息指勞福局局長張建宗同商經局局長蘇錦樑都想搵個好幫手。點解佢哋搵唔到「左右手」呢？據聞呢兩個政策局都不乏有心人想加入，但有知情人士形容，原本勞福局係最有望首批搵到副局長，因為最少有幾個人選，但係被視為人選嘅前梁振英競選辦副主任何永謙，有傳公務員內部對佢有意見，至於盛傳履歷條件叮噹馬頭嘅工聯會鄺志堅同社聯蔡海偉，政府就擔心選擇鄺志堅會得罪其他工會，後者則疑似自行縮沙，結果雙雙名落孫山。

至於商經局同樣面對類似情況，據聞蘇錦樑私下話想搵個副局長要有增值性，換言之可以同佢互補不足，但申請者唔係條件稍遜，就係欠缺政治歷練不能即時「上手」，所以聞說佢已退而求其次搵咗個政助頂住先，但礙於聘請程序需時，故暫時尚未可以對外公布。