政壇：IT豪晒全家福多咗個女

自從敗選後，久未露面嘅立法會前資訊科技界議員「IT豪」譚偉豪，尋日喺社交網站上載一幅全家福，入面除咗佢太太同讀緊中六嘅囝囝外，仲有一個着住大學畢業袍、手持兩束鮮花嘅靚女，唔通佢仲有個囡囡收埋咗？

知道後佢大笑咗幾聲，解釋個靚女查實係佢大家姐個女，即係佢嘅外甥女。佢話就讀科技大學專業會計學系嘅外甥女喺上月中畢業，身為舅父嘅佢當然要出席畢業禮見證重要時刻啦，所以先會引發呢個美麗嘅誤會。

IT豪話冇做議員後樂得清閒，晏晝喺屋企處理科技投資業務，由於囝囝心儀港大建築系，所以佢夜晚就會幫囝囝溫吓啲物理同數學。不過，佢大讚囝囝好多嘢一點就明，唔使佢講到口水都乾埋。